Discurs cun Mario Poltera (72), Schlarigna

La vegliadetgna da pensiun avess el gia daditg cuntanschì, tuttina sesa Mario Poltera anc oz mintga di en ses biro d’architectura a San Murezzan. “Quai n’è betg in stuair, quai è in pudair”, di el sez. Ed entant che la sanadad permettia da lavurar, fetschia el quai. E saun è Mario Poltera. Per la 43avla giada sa participescha el questa dumengia al Maraton da skis engiadinais. Cun quai ha el manchentà be duas cursas - quella dal 1991 è vegnida desditga, tar quella dal 2006 era el malsaun. “La finamira è da vegnir a S-chanf saun e frestg”, di il Giubiler Mario Poltera. En il Profil dal Radio Rumantsch raquinta Mario Poltera da Schlarigna da ses emprim maraton, nua ch’el ha fatg fauss tut quai ch’ins po far fauss, e dal midament da la tecnica classica a la tecnica skating.
Redacziun: Riccarda Mühlemann