Corin Curschellas e sia amur per la chanzun rumantscha

Corin Curschellas è pli probabel la chantadura rumantscha la pli enconuschenta. Sia chanzun "La pura" è daventada in bain cultural che vegn tgirà a chasa ed en scola. Naschida è quella chanzun a Paris, lunsch davent da chasa, sco las bleras da las chanzuns che Corin Curschellas ha scrit e chantà ils ultims trais decennis.

Dapi quatter onns viva Corin Curschellas a Rueun. Suenter ina odissea da Cuira a Turitg, Berlin, Paris e New York, turna ella en Surselva en la chasa dal tat. Là nua ch'ella vegniva sco uffant en vacanzas e nua ch’i vegniva chantà stedi e, sco ella punctuescha, adina en pliras vuschs.

Igl autur Gieri Venzin ha visità Corin Curschellas en ses nov dachasa, dentant era a concerts ubain en il studio durant la registraziun da sias novas chanzuns. Danunder deriva sia amur per la chanzun rumantscha? Tge motivescha ed inspirescha ella da far chanzuns?