Ina nova èra per RTR
Dapi l’entschatta da l’onn 2015 èsi capità bler: l’emprim il nov studio da televisiun cun tut sias pussaivladads tecnicas ed esteticas. Lura l’emissiun live da San Murezzan dal gieu da hockey da la segunda liga: per l’emprima giada ha RTR producì ed emess sin rtr.ch en tun e maletg in’occurrenza da sport regiunala –ina tala purschida na realisescha nagin auter che RTR.
Gea, e lura la nova pagina rtr.ch: ina pagina che preschenta in bouquet pli vast da temas e che correspunda tecnicamain e graficamain a las spectativas dal public dad oz. Tge vi jau dir cun questa enumeraziun? Primo: era sche RTR ha in public fidaivel – quai conferman las retschertgas adina puspè – stuain e vulain nus restar al current ed esser attractivs era per las persunas che consumeschan noss’offerta da program preferidamain online. Talas persunas datti adina dapli, e quai en tut las gruppas da vegliadetgna ed en tut las regiuns. Secundo: per l’emprima giada en l’istorgia da RTR avain nus la libertad da decider sezs quant vasta che nossa producziun da video duai esser. Sper in’offerta fitg impurtanta – dentant era fitg limitada – da la Televisiun Rumantscha sin SRF ed ils auters emetturs da la SRG SSR, avain nus uss in ulteriur chanal per emetter nossas istorgias filmadas. Per RTR e ses public è quai l’entschatta d’ina nova èra.