Cartas da visita
Sch’ins arriva sco giast tar RTR è il retschaviment l’emprim contact. Sch’ins telefona a RTR è – savens – il retschaviment l’emprim contact. Quant impurtant ch’in tal emprim contact è savain nus tuts: dal bainvegni en l’ustaria, en l’hotel,
en bancas u biros da viadi. In salid amiaivel ed in surrir è la meglra carta da visita per in’interpresa. Perquai deditgain nus l’artitgel principal da quests Accents
er a nossa grondiusa squadra dal retschaviment.
Dentant: betg mo las persunas al retschaviment èn «cartas da visita» da RTR. Tut las collavuraturas e tut ils collavuraturs ed era las commembras activas ed ils commembers activs da la SRG.R èn «cartas da visita» da nossa chasa. Gist en temps ch’il service public da la SRG SSR e sias unitads d’interpresa vegn discutà a moda cuntraversa, en temps che la societad dumonda rendaquint davart il diever da las taxas da radio e televisiun, è ina carta da visita professiunala ed amiaivla indispensabla. Lain pia far nossa lavur cun persvasiun, lain dar avertamain scleriment davart nossa incumbensa e tschertgar activamain il barat cun noss partenari il pli prezius: noss public.
In cordial grazia fitg a tut las «cartas da visita» da RTR. Ed in cordial grazia fitg a tuttas e tuts che sustegnan RTR en ina moda u l’autra.