In punct da program gia bunamain tradiziunal durant l’onn èn ils concerts da Nadal dad Origen a Landquart en las hallas grondas da la Viafier retica. Era quest onn – dals 18 - 20 da december 2015 – vegnan ils vaguns da tren a stuair far plazza ad ina inscenaziun da glisch e surtut al chor. Sut la batgetta dal Sursilvan Clau Scherrer vegn il public ad udir chant da la romantica – da Brahms, Rheinberger e da Mendelssohn Bartholdy.
Origen po festivar quest onn ses 10avel onn d’existenza. E quai prenda RTR gist sco occasiun per emetter ina emissiun speziala cun il festival cultural. Il resultat è ina emissiun da Cuntrasts cun passaschas or dal concert a Landquart. L’entir concert è silsuenter era da vesair sin www.rtr.ch en plaina lunghezza – cun in’inscenaziun da glisch che vegn a far l’artg da la stgiraglia da l’Advent enfin tar la glisch da speranza da Nadal.
En il program da RTR:
Cuntrasts: dumengia, ils 20 da december 2015, a las 17:25 sin SRF 1.
Sin www.rtr.ch a partir da dumengia, ils 20 da december 2015.