Siglir tar il cuntegn

Header

cuntegn

Medias 2015 Otmar Seiler mida da RTR tar «Schweiz aktuell»

Otmar Seiler lavura dapi 1999 per Radiotelevisiun Svizra Rumantscha. El mida per l’emprim da favrer 2016 tar SRF nua ch’el lavura sco moderatur e redactur per l’emissiun «Schweiz aktuell».

Otmar Seiler, 46, lavura dapi l’onn 1999 per Radiotelevisiun Svizra Rumantscha (RTR) a Cuira. Là ha el emprendì il mastergn da schurnalist: Seiler ha accumpagnà plirs onns audituras ed auditurs dal Radio Rumantsch tras la damaun e lavurà daspera sco redactur per differents formats. 2007 ha el midà tar la Televisiun Rumantscha, l’emprim sco moderatur da las emissiuns «Telesguard» e «Cuntrasts». Pli tard ha el era anc lavurà sco redactur e schurnalist da video e sco producent tar RTR ed ha manà tras l’emissiun da discurs «Tavulin».

Uss mida Otmar Seiler da RTR tar SRF: Davent dal 1. da favrer 2016 daventa el successur dad Oliver Bono e lavura sco moderatur e redactur per l’emissiun «Schweiz aktuell». Otmar Seiler è spanegià sin la nova sfida: «Sur onns hai jau astgà rapportar per RTR da las pli differentas fassettas dal chantun Grischun. Uss ma legrel jau sin il public da «Schweiz aktuell» e sin istorgias interessantas or da tut ils chantuns e las regiuns da la Svizra.»

Ladina Heimgartner, directura RTR: «Cun Otmar Seiler perda RTR in collavuratur fitg versà e stimà. Nus gudagnain dentant in ambassadur excellent per la Svizra rumantscha ed il Grischun tar SRF.»

Artitgels legids il pli savens