Il svilup digital mida il diever da medias ed ils basegns da la populaziun cuntinuadamain. RTR sa prepara per questas sfidas futuras e creescha perquai ina nova partiziun che vegn a s’occupar dals svilups da l’interpresa. La chasa da medias publica per la Svizra rumantscha duess uschia vegnir rinforzada a lunga vista, quai era per pudair ademplir las aspectativas da las Rumantschas e dals Rumantschs ad ina chasa da medias dal futur. A partir dal 2017 vegn Gian Ramming a manar questa partiziun sco schef dal svilup tar RTR.
Ladina Heimgartner: Jau deploresch d’ina vart fitg da perder in schefredactur da la qualitad da Gian Ramming, sun dentant cuntenta che ses grond know-how, sia experientscha e ses bun nas per innovaziuns survegnan in terrain gist tant fritgaivel cun la nova posiziun.
Gian Ramming lavura dapi 13 onns per RTR. Dapi il 2009 è el s’engaschà sco schefredactur per l’interpresa RTR ed ha furmà quella considerablamain. Sut sia batgetta èn formats da radio e televisiun cumprovads vegnids sviluppads enavant e novs formats èn vegnids lantschads cun success. Uschia per exempel l’emissiun da novitads per uffants “Minisguard” ubain las emissiuns spezialas da votaziuns ed elecziuns a la televisiun. Era la purschida d’online sin rtr.ch è vegnida engrondida successivamain sut l’egida da Ramming.
Gian Ramming: Set onns captivants, set onns ch’èn stads influenzads d’in mund da medias fitg variant e cun blers svilups. Jau sun engraziaivels che jau hai pudì influenzar decisivamain la via da RTR sco schefredactur tras questas midadas.!
Tras la midada da Gian Ramming è la plazza da la schefredactura resp. dal schefredactur RTR vacanta. RTR vegn a publitgar l’inserat per questa plazza las proximas emnas.