Siglir tar il cuntegn

Header

cuntegn

Qua na sun jau anc mai stà En l'ovra atomara a Leibstadt

Flurin Sarott ha lavurà blers onns sco manader da la partiziun da controlla da l'ovra atomara a Leibstadt - uss è el cun in pe en pensiun. Cun l'auter maina el la reportra Sabrina Bundi tras l'ovra atomara - almain tras quai ch'è avert per visitaders betg spezialisads.

Qua na po nagin camiun tras senza vegnir controllà.
Legenda: Porta d'entrada per camiuns: Qua na po nagin camiun tras senza vegnir controllà. RTR, Sabrina Bundi

La visita en l'ovra atomara da Leibstadt cumenza cun passar tras la controlla da segirtad. E quella è almain uschè severa sco quella a l'eroport. Passar pon ins be cun in «ticket», cun in permis. Lura è quai dad ir sco emprim tras in detectur da metal, sco segund tras in detectur che mesira la contaminaziun entras radioactivitad. Ed er ils autos e camiuns che vulan entrar en l'areal vegnan controllads da sura e da sut avant che las portas massivas s'avran. Segirtad è era il metier da Flurin Sarott. El ha lavurà passa 20 onns en l'ovra atomara a Leibstadt, blers da quels ha el manà la partiziun da controlla. En sia funcziun è el stà responsabel per la protecziun d'umans ed ambient envers radiaziun, dentant er per la segirezza sin l'areal. Il pli savens dat quai numnadamain, sco el di, accidents sumegliants sco en mintga auter manaschi, per exempel insatgi che cupitga.

Lavur d'auta segirezza

En la zona da coc, nua ch'il reactur sa chatta, pon ins be ir cun in permis spezial. Mintga lavurant sto midar vestgadira enfin sin las soccas e las chautschas sut avant ch'el va a lavurar e porta cun el in apparat che mesira la radioactivitad. La cupla alva sur il reactur nua che passa 62'000 bastuns nuclears sa nodan è 1,5 meters grossa ed or da betun da fier. Ella è grossa avunda per resister per exempel, sche in aviun avess da crudar sin ella. Ils lavurants en la centrala da controlla ston sa scolar enfin otg e diesch onns per pudair alura surpigliar tut la responsabladad.

Insaquantas cifras

L'ovra atomara a Leibstadt tranter Koblenz e Laufenburg è la pli giuvna ovra atomara da la Svizra: Ella è ida l'onn 1985 vid la rait. Per di producescha l'ovra sin 24 hectaras circa 29 milliuns uras kilowatt, quai che correspunda a circa in sisavel da quai che la Svizra dovra. En l'ovra lavuran radund 550 lavurantas e lavurants. La tur da sfradentar è 144 meters auta ed ha in diameter da bun 120 meters.

Artitgels legids il pli savens