«Suisse Quiz» – Tgi enconuscha il meglier la Svizra?

Quants pizs da passa 4000 meters datti en il Grischun? Co ha num la punt famusa a Lucerna? Nua datti il renumà festival da jazz? Las emprimas chadainas dals radios da la SRG SSR tschertgan la persuna ch’enconuscha il meglier la Svizra, sia geografia, sia historia, ses usits, sias atgnadads.

Casper Deflorin (68) da Mustér è il candidat da la Svizra rumantscha ch'ha dumagnà en il final dal Suisse Quiz. Là sa mesira el l'emprim d'avust cun in candidat dal Tessin, in da la Svizra franzosa ed ina candidata da la Svizra tudestga. Casper Deflorin è polimecanist pensiunà. El è bab da dus uffants creschids. Cun sia dunna gauda el da far viadis, era lunsch sur ils cunfins da la Svizra. Dar troccas e jass tutgan tar sia passiun sco era l'ir cun skis ed il ballapé. Avant la finalissima avain nus entupà el e guardà co el sa prepara, nua che sias fermezzas e flaivlezzas èn puncto savida sur da la Svizra.

FINALISSIMA il prim d'avust a Berna

Casper Deflorin vegn a represchentar la Svizra Rumantscha en il final dal prim d’avust 2017 a Berna en la chasa da medias da la chasa federala. Lura hai num: tegnair ils poleschs per Casper Deflorin encunter il candidat tessinais, quel da la Romandie e la candidata da la Svizra tudestga. Sin il victur spetga in bon da Svizra Turissem en valur da 5'000.- francs.

Il grond final vegn emess mardi, il prim d’avust da las 10.00 – 11.00 en l’entira Svizra tar Radio Rumantsch, RTS La Première, RSI Rete Uno e SRF 1. Moderada vegn l'emissiun per RTR da Ladina Schena e dad Annina Campell.

Betg pudì far part? I va era online …

A partir dals 26 da zercladur datti sin rtr.ch supplementarmain anc in Suissequiz online cun dumondas da tut gener sur da la Svizra. Participaziun via clic. Là po il victur u la victura gudagnar 1’500.- francs.