«Jau leva restar mo intgins onns»

Maria Santos è vegnida cun 21 onns dal nord dal Portugal sisum la Surselva. L’emprim a Mustér, pli tard lura en Tujetsch. Il motiv era fitg cler, la lavur. Ella vuleva gudagnar daners e suenter intgins onns puspè turnar a chasa.

ina dunna cun cavels liungs stat davant in buffet en ina ustaria. Avrir maletg en lightbox.

Legenda da maletgs: Maria Santos ha realisà il siemi da l'atgna ustaria. Esser sezza l'ustiera porta sper la responsabladad era avantatgs. RTR / Esther Berther

Dentant èn passads 21 onns. La mesadad da sia vita ha Maria Sontos ussa vivì en il Grischun. Ella ha emprendì fitg bain il linguatg, sa senta da chasa qua. Avant 3 onns è ella sa decidida da surprender l’ustaria dal Buffet a Sedrun. Ensemen cun ses um maina ella ussa quella ustaria nua che giasts da vacanzas, indigens e Portugais s`entaupan.

«Mes trais uffants - per els è Sedrun lur dachasa», di Maria Santos che sto sezza rir, cura ch’ella patratga ch’ella avevav atgnamain previs da restar mo in curt temp en il Grischun. Portugal è dentant daventà sia destinaziun da vacanzas. Quai mintg’onn.

L’emprim temp en il Grischun, cura ch’ella n'enconuschevi nagin e na chapiva era nagut, haja ella bragì bleras notgs, raquinta Maria. Era pareva la glieud in pau fraida. Oz na saja quai betg pli uschia. «Jau na sai dentant betg, sch'ella è sa midada u sche jau sun m’adattada durant quests 20 onns» di Maria riend.

Laschar ir video «Maria Santos è vegnida dal Portugal al Grischun»

Maria Santos è vegnida dal Portugal al Grischun

0:42 min, dals 14.6.2017