Siglir tar il cuntegn

Header

cuntegn

Allegra Vorarlberg… «Burn Out» – il meglier whisky dal rest dal mund

Il «Burn Out» è in whisky cun ingredienzas da la Scozia, brischà en ina garascha en il Vorarlberg. Ed il «Burn Out» è vegnì premià d’in impurtant magazin spezialisà american il 2014 sco meglier Whisky dal rest dal mund. Ma tuttina na vegn quest Whisky betg vendì als americans.

In tschaler plain stgazis.
Legenda: In tschaler plain stgazis. RTR/ORF/Ch. Suter

En il Vorarlberg datti passa 2'500 brischa-vinars. Mintgin dastga brischar sia atgna puma. Sch'ins less brischar ervas u puma estra, lura vegn quai in zic pli cumplitgà. Ils dus frars Bruno ed Eugen Broger han midà lur destillaria l’onn 2008 en ina «Verschlussbrennerei». Tuttina è il brischar vinars restà in hobby per els. Lur destillaria è anc adina endrizzada en la garascha da Bruno Broger.

audio
Broger: Whisky premià
ord RTR Audio dals 04.05.2016.
laschar ir. Durada: 3 minutas 24 Secundas.

Tuts vulan il «Burn Out»

Bruno ed Eugen Broger han adina gugent experimentà cun products da la regiun. Ma tuttina vulevan els far ina giada in dretg whisky da la Scozia. Ed uschia han els empustà las ingredienzas d’in importader scot. Ordlunder hai dà il «Burn Out». In whisky plitost brusc cun aroma da terra. Sin dumonda d’in magazin american han ils frars tramess in sitg per schar valitar la qualitad da lur whisky. Avant ch’els han savì il resultat da las examinaziuns èn las emprimas empustaziuns arrivadas per mail en il Vorarlberg. Pir cura ch'in club da whisky d'Atlanta ha gratulà per la distincziun dal meglier whisky dal mund èsi stà cler daco ch’il whisky ord la garascha ha tuttenina renum mundial.

Ils frars Bruno ed Eugen Broger brischan vinars per hobi.
Legenda: Ils frars Bruno ed Eugen Broger brischan vinars per hobi. RTR/ORF/Ch. Suter

Il Whisky Advocate, il pli grond magazin da whisky da l’America ha descrit il whisky cun ils pleds: En il nas sco in tigher, en la gula sco in giat. E quella descripziun plascha fitg bain als frars Broger.

En il nas sco in tigher, en la gula sco in giat
Autur: Whisky Advocate Magazin da whisky

Ma perquai ch’els han gì brischà sulettamain 1'000 liters dal Whisky prezius n’hai betg bastì da furnir el als interessents sur mar. Ed uschia è e resta il «Burn Out» en la regiun nua ch’el vegn brischà, en il Vorarlberg.

Artitgels legids il pli savens