En il Montafon cuschin’ins Brösel, en il Bregenzerwald Riebel. E sco tar mintga spaisa tradiziunala ha mintga famiglia ses agen recept. En il Montafon vegn il Brösel fatg cun Semulina (Riebelgriess), en il Bregenzerwald dovr’ins tirc (Ribelmais) per far il «Riebel».
Alice Bertogg ha cuschinà en il Montafon, uschia ch’ella ha fatg Brösel.
Dultsch u picant
I dat in Brösel dultsch ed in Brösel picant.
Tar il Brösel dultsch dovr’ins be la semulina che vegn brassada en il paintg e lura maschadada cun cumpot e zutger.
Il Brösel picant vegn cuschinà cun tartuffels cotgs. La semulina ed ils tartuffels vegnan brassads en il paintg e sisura vegn springì chaschiel tipic dal Montafon, il «sura Käs». Il past vegn servì cun salata.
Brösel = Maluns?
Ils maluns sursilvans èn ina maschaida tranter il Brösel dultsch ed il picant. Ils maluns na cuntegnan nagina semulina, dentant farina e tartuffels. Empè da springir il chaschiel sur la spaisa, vegn quest mangià dals sursilvans sper ils maluns e cun compot gustan ils maluns gist uschè bain sco il Brösel dultsch.
