Siglir tar il cuntegn

Header

cuntegn

Exteriur Aleppo vinavant sut fieu

Almain 25 persunas èn mortas la sonda bun’ura tar bumbardaments da l’armada siriana en il ost da la citad dad Aleppo. Quai rapport l'agentura da novitads franzosa AFP. Tenor il post d’observaziun sirian per ils dretgs umans sajan ils bumbardaments stads intensivs.

En la Siria han l'armada siriana e milissas alliadas conquistà terren en il nord da la citad Aleppo. Tranter auter saja uss in champ da fugitivs sut la controlla da las truppas sirianas. Quai annunzian tant l'armada sco er represchentants dals rebels. Avant avevan aviuns da cumbat puspè fatg grevas attatgas sin quels quartiers d'Aleppo ch'èn en ils mauns dals rebels.

Dapi la fin da l'armistizi èn mortas almain 180 persunas

Gia en venderdi èn tenor indicaziuns da la protecziun civila locala vegnidas mazzadas almain 100 persunas. Il post d’observaziun sirian per ils dretgs umans discurra da 47. L'agentura da pressa tudestga DPA citescha il post en rapportond che dapi la fin da l'armistizi in glindesdi sajan mortas pli che 180 persunas - da quai almain 26 uffants.

Offensiva per conquistar Aleppo

L’armada siriana aveva annunzià ils bumbardaments sco part dad in’offensiva sin la citad dad Aleppo che vegnia a vegnir sustegnida era da truppas sin il fund. La finamira da l’armada siriana saja da reconquistar aifer in'emna l’entira citad dals rebels, citescha l'agentura Reuters ad in commandant dad ina gruppa alliada cun l'armada siriana.

Pli che 250'000 persunas vivan anc en l'ost dad Aleppo

L'armada siriana vegn sustegnida da la Russia. Sco quai che rebels raquintan hajan per gronda part jets russ bumbardà ils quartiers dad Aleppo ch'èn en ils mauns dals rebels. En l'ost da la citad vivan anc adina pli che 250'000 persunas.

In armistizi da set dis n’era betg vegnì prolungà glindesdi passà. La Russia ed il Stadis Unids che sustegnan partidas differentas en la guerracivila n’han anc betg sa savì metter d’accord davart in proxim armistizi.

RR novitads 12:00

Artitgels legids il pli savens