Tar in di da malencurada naziunala commemorescha la Russia questa dumengia las passa 130 unfrendas da l'attatga terroristica sin ina halla da concert datiers da Moscau. Las bandieras èn a mesa asta e portan in vel da malencurada. En bleras citads russas porta la glieud fluras e chandailas tar monuments e posts da commemoraziun.
Putin vesa «fastiz ucranais»
La milissa terroristica «Stadi islamic» pretenda d'esser responsabla per l'attatga, ma il president russ Putin ha vesì plitost in «fastiz ucranais» davos l'attentat – senza dentant preschentar mussaments. Il ministeri da l'exteriur ucranais refusa la speculaziun che l'Ucraina pudess avair da far insatge cun l'attatga. Ed era ils Stadis Unids da l'America han accentuà, ch'i na dettia nagins indicaziuns che l'Ucraina u Ucranais sajan responsabels per l'attatga.
Teaters, kinos e museums restan serrads
Ultra da quai restan la fin d'emna tut ils teaters, kinos e museums serrads a Moscau. Avant aveva il president da la citad da Moscau gia annunzià che tut las occurrenzas grondas a Moscau vegnian annulladas. Tenor l'agentura da novitads russa Tass ha la citad da Moscau era rinforzà las mesiras da segirezza sin ed enturn las plazzas aviaticas e las staziuns da tren. Era en il conturn da la chapitala russa han las autoritads scumandà occurrenzas grondas.
IS ha publitgà video
L’organisaziun terroristica «Stadi Islamic» ha publitgà sin Telegram in video da l’attatga sin ina halla da concert a Moscau. Il video saja vegnì chargià si da la partiziun da communicaziun «Amaq» dal «Stadi Islamic». Quai rapportan agenturas da novitads. Sin il video vesian ins umens en vestgis da camufladi che giajan cun armas automaticas tras il foyer da la halla da concert. Da l’attatga il venderdi saira èn 133 persunas vegnidas mazzadas. I sa tracta da l’attatga la pli sanguinusa dal «Stadi Islamic» sin terren europeica.
Gia publitgà foto dals attendaders supponids
La milissa terroristica dal Stadi Islamic ha publitgà ina fotografia che duai mussar ils quatter attentaders supponids. L'attatga stettia en connex cun la «guerra» tranter il Stadi Islamic ed ils pajais che veglian cumbatter l'islam, scriva in represchentant da la milissa terroristica sin il servetsch da novitads Telegram.
Experts van da quai anora ch'il scriver saja vardaivel. Da vart uffiziala russa na datti anc nagina reacziun sin la foto ed il messadi.
L’ultim temp avevan ambassadas dal vest avertì d’attatgas terroristicas en la chapitala russa. Differents pajais avevan sinaquai appellà a la populaziun da betg sa participar ad occurrenzas grondas a Moscau.
Tge schabegia cun ils attentaders?
Ils quatter attentaders supponids principals èn vegnids transportads la sonda saira per l'interrogaziun en la chapitala russa. Ils umens èn vegnids arrestads en la regiun da Brjansk en il sid dal pajais. Sco quai che l'agentura statala Tass ha plinavant rapportà, èn els vegnids transportads en ina colonna survegliada. Ils proxims dis duai vegnir fatg ina proposta per cumond d'arrest avant dretgira. Ad els smanatschia in chasti d'arrest per vita duranta. Suenter l'attentat eran en tut 11 persunas suspectadas vegnidas arrestadas.
Blers morts e blessads
Entant è confermà che 133 persunas èn mortas en consequenza da l'attatga sin la halla da concerts a Moscau. Enten rumir la halla destruida hajan las truppas da salvament chattà ulteriuras baras, uschia las autoritads. Almain 143 persunas èn vegnidas blessadas tar l'attatga. Sco quai ch'il servetsch secret intern russ ha communitgà, ha la polizia entant arrestà 11 persunas. La polizia haja ultra da quai franà l'auto da fugia supponì. En quel haja gì armas.
Umens armads èn entrads en la halla da concerts venderdi saira ed han sajettà enturn. Tenor medias russas, haja silsuenter dà ina explosiun ed in fieu saja rut or.
