Siglir tar il cuntegn

Header

cuntegn

Exteriur Attatgas en Catalugna: Plans per attatga sin «Sagrada Familia»

In dals suspectads haja confessà a Madrid avant la dretgira statala d'avair planisà pliras attatgas cun material explosiv. Tranter auter er sin la basilica «Sagrada Familia» a Barcelona. Quai rapportan medias localas che sa basan sin indicaziuns da la giustia spagnola.

Il mardi han ils quatter suspectads, che han survivì dals 12 terrorists probabels, stuì sa preschentar avant dretgira. In derschader ha uss da decider sche e tge accusa che vegn fatga cunter ils umens.

Ils quatter suspectads èn dapi il mardi a bun'ura avant dretgira

Sut mesiras da segirezza severas eran ils quatter arrestads vegnds transportads il mardi a bun’ura ad in’audiziun tar la dretgira statala «Audiencia Nacional» a Madrid. Ils quatter umens valan sco ultims survivents da la cella da terror, ch'è responsabla per las attatgas da terror a Barcelona e Cambrils cun 15 morts e dapli che 100 blessads.

Suspectà principal da Barcelona sajettà da polizia

Il glindesdi aveva la polizia sajettà il suspectà principal da l'attatga a Barcelona a Subirats, 50 kilometers davent da Barcelona. L’um da 22 onns era para il manischunz da l’auto da furniziun ch’è charrà la gievgia passada en passants sin il boulevard Las Ramblas. Tenor medias spagnolas suppona la polizia, che l’um saja stà en viadi a pe dapi l’attatga.

Probabel tirafils da la cella da terror mort gia l'emna passada

Il mardi la bun’ura aveva la polizia gia confermà, che l’imam – che valeva sco pussaivel chau da la gruppa da terror – saja mort. El saja mort gia l’emna passada tar in’explosiun en la chasa, nua che la gruppa aveva planisà ils attentats.

RR novitads 11:30

Artitgels legids il pli savens