Siglir tar il cuntegn

Header

cuntegn

Exteriur Brexit cumenza

Bunamain 1 onn suenter la votaziun da Brexit èsi oz uschè lunsch: A Brüssel cumenzan las tractativas per che la Gronda Britannia possia sa distatgar da l'Uniun Europeica. La posiziun da Londra è dentant intscherta e Theresa May betg pli uschè ferma.

A Brüssel sesan dus umens per l'emprima giada vid ina maisa per contractar il Brexit: Michel Barnier per l'Uniun Europeica e David Davis per la Gronda Britannia.

Tractativas cumplexas

I para sco sche la Gronda Britannia stuess acceptar il proceder per las tractativas che l'Uniun Europeica ha poponì. I va surtut per quels temas:

  • Sclerir la situaziun legala: Tge capita cun ils burgais da l'UE en Gronda Britannia ed ils burgais britannics en pajais europeics?
  • Finanzas: Co vesa il quint final ora tranter l'UE e la Gronda Britannia? Quant sto la Gronda Britannia pajar enavos a Brüssel?
  • Cunfins: Tge capita cun ils cunfins tranter l'Irlanda (commembra da l'UE) e l'Irlanda dal nord (part da la Gronda Britannia)?

audio
Mezdi: Discurs per Brexit cumenzan
ord Actualitad dals 19.06.2017.
laschar ir. Durada: 3 minutas 28 Secundas.

Theresa May pli flaivla

Ditg valaiva la primministra Theresa May sco la fatscha da la Gronda Britannia - sco quella che realisescha in «dir Brexit». La critica suenter las attatgas terroristicas a Londra e la terrada en las elecziuns dal parlament han dentant laschà fastizs: Theresa May cumbatta actualmain per furmar ina regenza (ensemen cun la partida pitschna DUP da l'Irlanda dal nord) e per uschia restar a la testa dal pajais. Perquai vesan experts ina primministra pli flaivla ed in pajais che na sa betg propi tge sort da Brexit ch'el vul.

In urari ambizius

Las tractativas per il Brexit fan prescha: Enfin il mars 2019 duai la cunvegna tranter l'Uniun Europeica e la Gronda Britannia esser sut tetg. Lura ston ils parlaments dals stadis da l'UE sco era il parlament britannic ratifitgar la cunvegna. Ils 29 da mars 2019 è la commembranza britannica en l'UE a fin - suenter 46 onns e 3 mais.

RR actualitad 12.00

Artitgels legids il pli savens