Brüssel e Londra sa cunvegnan cun l'urari per discurs da Brexit

L'Uniun europeica e la Gronda Britannia sa cunvegnan tge puncts che duain vegnir discutads sco emprim.

Purtret dals dus umens. Bild in Lightbox öffnen.

Legenda da maletgs: David Davis, da la Gronda Britannia e Michel Barnier da l'UE. Els contraheschan il Brexit. Keystone

Sco emprim duain vegnir discutads ils dretgs dals pertutgads da la sortida da la Gronda Britannia or da l'Uniun europeica. Plinavant duain vegnir discutadas las finanzas che la Gronda Britannia duai pajar sco era ulteriuras dumondas da separazkiun. Uschia il manader da las contractivas da l'UE, Michel Barnier suenter l'emprima runda da discussiun.

«  Oz avain nus fixà termins, l'organisaziun e las prioritads per negoziar. »

Michel Barnier
Manader da negoziuns da l'UE

Finamira saja che la Gronda Britannia sappia sortir a moda organisada da l'UE. Uschia vegnian malsegirezzas eliminadas. I saja pussaivel da sa cunvegnir a moda faira e quai saja meglier che d'avair nagina cunvegna.

Bun start

David Davis ha discurrì d'in bun start. Ma tuttina sajan els pir al cumenzament da las tractativas. La via saja anc lunga. I saja dentant cler che omaduas varts veglian lavurar ensemen, i dettia bler en cuminanza. Davis ha era annunzià che la primministra Theresa May haja en senn da far ina proposta pertutgant il stadi dals burgais da l'UE en Gronda Britannia.

Barnier ha avisà ch'i dettia pauc temp enfin la sortida da la Gronda Britannia or da l'UE, il mard 2019. Finamira saja d'avair mintga mais in'emna discussiun. Tenor la regenza britannica èn ils termins enfin l'october gia fixads. Ils discurs duain cuntinuar ils 17 da fanadur, lura ils 28 d'avust e lura ils 18 da settember ed ils 9 d'october.

RR novitads 20:00