Siglir tar il cuntegn

Header

cuntegn

Exteriur Cabinet da Trump è cumplet

Cun Alexander Acosta ha il senat ussa confermà l'ultim chau dal cabinet da Trump. El daventa minister da lavur.

Dapli che trais mais suenter che Donald Trump è entrà en uffizi ha Trump pudì cumplettar ses cabinet. Il senat ha approvà la gievgia cun 60 cunter 38 vuschs il giurist Alexander Acosta che daventa minister da lavur.

El è l'emprim commember dal cabinet cun ragischs latinoamericanas. Acosta è sco ultim stà decan da la facultad giuridica a l'universitad da Florida. El è già stà en plirs uffizis en l'administraziun dals Stadis Unids.

Il candidat uriund da Trump, Andrew Puzder ha demissiunà perquai ch'el na fiss probablamain betg vegnì tras tar il senat. El aveva fatschentà onns or illegalmain in'immigranta senza lubientscha da domizil sco chasarina.

Trump ha gia intginas giadas gì problems da rivar tras cun ses candidats per uffizis da regenza e sto cumbatter sin pliras frontas cun problems da persunal. Uschia è er il cussegliader naziunal per segirezza, Michael Flynn sa retratg pervi da contacts dubius cun la Russia. Da curt ha Trump era relaschà ses schefstrateg, Steve Bannon dal cussegl da segirezza naziunal.

RR novitads 10:00

Artitgels legids il pli savens