Suenter che passa 99% da las vuschs èn dumbradas, ha ina pitschna maioritad da 50,23% ditg na a la cunvegna da pasch. Tenor enquistas avant la votaziun era anc ina gronda maioritad per questa cunvegna.
In NA a la pasch?
Cun il na a la cunvegna na dian las Columbianas ed ils Columbians na a la pasch sco tala. Els na sun simplamain betg d’accord cun quai che sta scrit en la cunvegna. Tenor els han ils rebels da la Farc bler massa blers avantatgs en la cunvegna. Ils rebels han terrorisà sur onns il populaziun Columbiana e blers dad els han era pers in quella guerra commembers da la famiglia. E ussa, tenor la cunvegna survegnissan ils rebels in tractament spezial pertutgond la via giuridica. Tenor cunvegna vegniss tratg in stritg e quasi emblida tut quai che è capità e cumenzà da nov. Però blers Columbians vesessan ils chaus dals rebels pli gugent in praschun sco lura perfin en il parlament Columbian, che foss era ina part da la cunvegna.
Co vinavant?
Era sch'i ha dà in na a l’urna vulan la regenza columbiana ed ils rebels da la Farc sa tegnair vid in armistizi. Nagin dad els saja interessà da far vinavant guerra. Quai era betg perquai ch'i è vegnì investì var quatter onns per chattar ina cunvegna cuminaivla. Tuttas duas partidas vulan chattar in’autra via per pudair salvar la cunvegna. Gia oz sajan represchentants da la regenza e dals rebels vegnids ensemen per evaluar la situaziun. Dentant propi in plan B n'han ins anc betg perquai che nagin avess spetgà che la populaziun da la Columbia di na a la cunvegna.
Il president columbian Juan Manuel Santos ed il cumandant da la Farc Timoleon Jimenez avevan suttascrit la cunvegna istorica il glindesdi passà.
La pausa da cumbat cun la Farc duai però tuttina restar en vigur, ha ditg il president Juan Manuel Santos. Sur 52 onns ha durà la guerra en Columbia e procurà per sur 260’000 morts.
Il schefnegoziader da la Columbia renunzia
Suenter il naufragi dal referendum pertutgant la pasch cun la FARC renunzia Humberto de la Calle. El na veglia betg esser in obstachel per quai che suondia ussa. De la Calle aveva manà la delegaziun da la regenza durant las negoziuns cun la FARC a Cuba.
RR novitads 06:00
