Il sboz, preschentà dal minister da l'exteriur franzos e manader da la conferenza Laurent Fabius, è vegnì acceptà dal plenum dals 195 stadis participants unanimamain. Suenter diras contractivas ha Fabius annunzià quai la sonda saira.
Las finamiras principalas
La cunvegna preveda da limitar il stgaudament dal clima sche pussaivel sin 1,5°, cumpareglià il temp pre-industrial. Ed in fond d'agid per pajais da svilup, ch'èn pertutgads particularmain da la midada dal clima, duai vegnir alimentà cun 100 milliardas dollars fin il 2020.
La cunvegna va en vigur cura ch'almain 55 stadis han ratifitgà ella. Quests stadis ston dentant era esser responsabels per almain 55 pertschient da las emissiuns globalas dals gas cun effect da serra.
La Svizra è cuntenta
Per Cussegliera federala Doris Leuthard è la cunvegna davart il clima in bun cumpromiss. Il pli impurtant saja che per l'emprima giada hajan tut ils pajais surpiglià responsabladad, ha Leuthard ditg a las medias svizras. La Svizra avess dentant preferì, che pajais en svilup avessan stuì sbassar pli fitg lur emissiuns.
Per reducir ils gas cun effect da serra haja la Svizra sa mess finamiras ambiziusas, ha declerà la cussegliera federala. Ella saja spanegiada co il parlament svizzer reageschia l’onn che vegn, cura che la lescha dal CO2 saja da reveder.
RR novitads 20.00/06.00