Siglir tar il cuntegn

Header

cuntegn

Exteriur Elecziun Van der Bellen - reacziuns en tut il mund

L'elecziun dad Alexander van der Bellen sco president da l'Austria ha procurà per reacziuns en tut il mund. Igl è vegnì gratulà als victurs e perdents. L'elecziun era sa decidida cun 50,3 % : 49,7% da las vuschs piz a cup. Il contrahent Norbert Hofer (FPÖ) ha concedì sia terrada.

Il president tudestg Joachim Gauck ha gratulà al «European persvas» per sia elecziun. Suenter la victoria dad Alexander van der Bellen giaja in suspir da surlevtg tras l'Europa, ha ditg il minister da l'exteriur talian Paolo Gentiloni.

Il prim-minister franzos Manuel Valls ha communitgà via twitter ch’igl saja in surlevtg da vesair ch'ils Austriacs sajan cunter populissem ed extremissem.

31'000 vuschs differenza

Il nov president da l’Austria, Alexander Van der Bellen (72), sustegnì dals verds, ha survegnì 50,3 pertschient da las vuschs. Il populist da la dretga e concurrent Norbert Hofer ha fatg in resultat da 49,7 pertschient.

audio
Saira: Austria ha in nov president - Alexander Van der Bellen
ord Actualitad dals 23.05.2016.
laschar ir. Durada: 3 minutas 38 Secundas.

Tranter ils dus candidats ha quai la fin dà ina differenza minimala da be 31’026 vuschs. Totalmain èn vegnidas inoltradas radund 4,6 milliuns vuschs.

La participaziun a l’urna munta a 72,7 pertschient, communitgescha il minister da l’intern. Per l’emprima giada ad in’elecziun decisiva n’eran represchentads nagins candidats da las partidas regentas SPÖ ed ÖVP. Tranter auter pervi d’in debachel en l’emprima runda da l’elecziun presidiala era sa retratg il chancelier Werner Faymann.

In'elecziun captivanta

Atgnamain era Norbert Hofer partì sco cler favurit en l'elecziun suenter ch'el aveva gudagnà l'emprim scurttini cun radund 35% da las vuschs. Sche Hofer gudagnass l'elecziun, fiss el l'emprim president europeic or da las retschas dals populists da la dretga.

Decidì n'è uschia anc nagut. Decisivas èn uss las 700'000 vuschs ch'èn vegnidas per posta, quellas vegnan dumbradas pir glindesdi. Cun il resultat final èsi da quintar glindesdi saira tranter las 17 e las 19 uras.

audio
Bunura: Las elecziuns en Austria - in discurs
ord Actualitad dals 23.05.2016.
laschar ir. Durada: 3 minutas 1 Secunda.

Nagina schanza per las partidas da regenza

Las partidas da la regenza acutala, SPÖ ed ÖVP, n'han gì nagina schanza da trametter in candidat en il cumbat per il presidi da l'Austria. Lur candidats han survegnì be radund 10% da las vuschs. Quai è l'emprima giada dapi la segunda uiara mundiala che quellas partidas n'han nagin candidat per il post dal president dal stadi - tranter auter er in motiv ch'il chanzelier Werner Faymann (SPÖ) ha demissiunà l'enschatta matg.

Il president actual, il socialdemocrat Heinz Fischer, n'ha betg pli pudì candidar suenter duas periodas d'uffizi da 6 onns.

RR novitads 07:00+ / 17:00

Artitgels legids il pli savens