Elecziuns en Frantscha: Emprima debatta

Tschintg emnas avant las elecziuns en Frantscha èn ils tschintg candidats sa duellads per l’emprima giada en la televisiun.

Politichers franzos. Bild in Lightbox öffnen.

Legenda da maletgs: Fillon, Macron, Mélenchon, Le Pen ed Hamon (da san.).... Reuters

  • Cun l'emprima debatta en la televisiun ha cumenzà en Frantscha la fasa decisiva dal cumbat electoral per la presidenza.
  • Ils tschintg candidats cun las meglras schanzas èn sa duellads.
  • Ils 23 d'avrigl è l'emprim scrutini. Duas emnas pli tard vegn elegì il successur u la successura da François Hollande.

Cunzunt il represchentant independent Emmanuel Macron e la candidata dretg-populistica Marine Le Pen han debattà vehement. Quai cunzunt areguard la dumonda davart simbols religius en la publicitad. Tranter auter ha Le Pen renfatschà a Macron da sustegnair ils uschenumnads «burkinis». Ina sort vestgì da bogn per l’entir corp. Macron percunter ha renfatschà a Le Pen da provocar. El n’acceptia betg che Le Pen derasia disfamaziuns. Le Pen ha suttastritgà da vulair esser la presidenta da la Frantscha e betg mo survegliar ina regiun da l’Uniun europeica:

«  Jau na vi betg esser la vicechanceliera dad Angela Merkel. »

Marine Le Pen
Candidata per la presidenza franzosa

Ella ha er fatg cler da vulair sortir da l’UE e da la zona da l’euro. Macron da sia vart represchenta in curs pro-europeic e social-liberal.

Ils ulteriurs candidats

Sursiglir cuntegn supplementar

Macron ha persvas

Macron ha persvas

Suenter l’emprima debatta han retschertgas en l’internet mussà ch’il candidat independent Emmanuel Macron ha pudì persvader il meglier, suondà dal candidat da la sanestra Jean-Luc Mélenchon. Sin plazza trais èn communabel Marine Le Pen ed il conservativ François Fillon. Sin l’ultim plaz è il mument il socialist Benoît Hamond.

Dasper Le Pen e Macron han trais ulteriurs candidats fatg part da la discussiun: il socialist Benoît Hamon, il candidat da la sanestra Jean-Luc Mélenchon ed il conservativ François Fillon. Fillon valeva ditg sco favurit, ma in scandal da corrupziun ha midà quai. Dentant na dat el betg si ed ha mess la paisa sin sia experientscha politica. Fillon vul introducir vastas refurmas economicas ed in curs da spargn rigurus.

L'immigraziun – tschintg opiniuns

Areguard l’immigraziun èn las opiniuns dals tschintg candidats fitg differentas. Entant che Le Pen vul franar l’immigraziun, ha Hamon fatg attent che la quota dad esters saja stabila en Frantscha dapi ils onns 1930. Tenor Mélenchon n’è ina limitaziun betg da realisar. Fillon pretenda in sistem da quotas tar l’immgraziun. Quella na duaja dentant betg valair per requirents d’asil.

Le Pen e Macron cun las meglras schanzas

Tenor retschertgas han Le Pen e Macron las meglras schanzas sin l’elecziun decisiva ils 7 da matg. Lura valess Macron sco favurit. Quai demussan retschertgas actualas. Dentant èn bunamain 40% dals votants anc intscherts. Plinavant fan demoscops attents che blers dals dumandads na veglian betg dir publicamain a tge candidat ch’els dessan lur vusch en il segund scrutini.

RR novitads 06:00