Il president russ Wladimir Putin ha sco spetgà annunzià ch'el candideschia danovamain per l'elecziun da president ch'è l'auter onn. Quai rapportan medias statalas russas. Putin haja confermà sia candidatura tar ina ceremonia per onurar il militar.
Il politicher da 71 onns aveva laschà midar la constituziun russa per anc ina giada pudair candidar sco president, la tschintgavla giada. Ordavant aveva la cumissiun electorala centrala confermà uffizialmain il termin per la votaziun.
La televisiun statala russa mussa gia dapi dis burgais e burgaisas che empermettan a Wladimir Putin d'eleger el. Suenter la ceremonia han purtaders d'uffizi da la Russia er declerà lur loialitad per Wladimir Putin.
2018 è Putin vegnì elegì cun 76,69% sco president da la Russia. Tar las elecziuns ils 17 da mars vala Putin sco victur segir. Autras candidatas e candidats n'han nagina schanza, e duain mo far la parita da concurrenza.
Putin sa preschenta sco opponent da l'USA e da l'extensiun da la NATO envers l'ost. Stilisar il Vest sco inimi funcziuna tar l'electorat.
