Suenter quatter onns saja la legislatura a fin e la constituziun prescrivia elecziuns dal parlament. Uschia argumentescha Baschar al-Assad las elecziuns.
Per il correspundent dad SRF Philipp Scholkmann è quai dentant be ina stgisa. Atgnamain veglia il reschim dad Assad dar in signal politic a ses adversaris ed a l'entir mund e demussar che tut saja normal en Siria, ch'el resguardia la constituziun e ch'el haja anc adina la pussonza da l'entir pajais.
Las elecziuns èn ina farce e na midan insumma nagut.
Boicot e critica
En tut candideschan 3'500 persunas per ils 250 sezs. Pervi da la guerra civila pon dentant be circa 60% ir ad eleger - be la populaziun che viva en territoris controllads dal reschim da Baschar al-Assad.
Las partidas da l'opposiziun crititeschan perquai che las elecziuns dal parlament na sajan betg democraticas ed han appellà al boicot. Vi dal resultat na midia quai dentant nagut, declera Philipp Scholkmann:Il parlament restia era suenter las elecziuns sut controlla dal reschim. Baschar al-Assad veglia be demonstrar sia fermezza e cumprovar ch'el saja legitimà da reger en Siria - gist era en vista a la segunda runda dals discurs da pasch che cumenzan mesemna saira a Genevra.