FBI dementescha – Trump insista

Il president dals Stadis Unids Donald Trump insista sin sias renfatschas da spiunascha envers ses antecessur en uffizi Barack Obama.

Directur dal FBI. Bild in Lightbox öffnen.

Legenda da maletgs: Tenor il directur dal FBI James Comey na datti nagins indizis per las renfatschas da Trump. Keystone

Sur ses pledader ha Trump laschà communitgar che la decleraziun dal directur dal FBI, James Comey davant il congress n'haja betg midà insatge. I sa tracti sulettamain d'ina emprima audiziun. La via saja anc lunga.

Comey aveva declerà en il congress ch'el na sappia nagut davart ina tala spiunascha. Er il schef dal servetsch secret NSA, Mike Rogers ha ditg da l'audiziun ch'el na sappia nagut d'in'acziun da spiunascha cunter Trump.

Investigaziuns cunter team da Trump

Entant ha Comey confermà ch’il FBI investigheschia davart las attatgas probablas da hackers russ durant il cumbat electoral. I na giaja betg mo persuenter sche la Russia haja empruvà d’influenzar il resultat. I giaja er per las relaziuns tranter il team da Donald Trump e la regenza russa. La dumonda saja sch’i haja dà ina coordinaziun tranter collavuraturs da Trump e las intervenziuns probablas da la Russia en il cumbat electoral. Detagls n’ha Comey betg numnà. En il focus stat pia il stretg conturn dal president.

RR novitads 22:00