Il concern d'autos american General Motors cloma enavos passa 2,5 milliuns autos en la China pervi da problems cun airbags. I pudessan esser installads airbags manglus, uschia ha argumentà la surveglianza da qualitad chinaisa. I sa tractia d'airbags dal producent giapunais Takata. La fin d'october vegnan clamads enavos radund 13'000 models da Saab ed Opel, la fin da december lura passa 2,5 milliuns da Chevrolet e Buick. Avant curt ha la surveglianza chinaisa declerà ch'ella stoppia clamar enavos 4,8 milliuns autos da VW, quai medemamain pervi da problems cun airbags da Takata.
L'agentura da novitads Xinhua ha rapportà che tut en tut sajan airbags manglus da Takata vegnì bajegiads en tar passa 20 milliuns autos da 37 differents producents. Sin l'entir mund vegnan 16 accidents mortals mess en connex cun airbags defects da la firma Takata. Cun agid da constructurs d'autos ha l'interpresa Takata questa stad fatg in bancrut controllà.
RR novitads 08:00