Ina maioritad absoluta ha vuschà per l'anteriura ministra da l'exteriur. Uschia è Clinton l'emprima dunna en l'istorgia dals Stadis Unids che vegn tramessa en la cursa per la Chas'Alva d'ina da las grondas partidas.
Cun Bernie Sanders ha Clinton gì be in cuntracandidat uffizial. En in appel als delegads è il senatur da Vermont sa mess davos sia collega da partida e ditg che Hillary Clinton stoppia daventar la nova presidenta dals Stadis Unids. Tar l'elecziun il 8 da november 2016 candidescha la democrata cunter il republican Donald Trump.
Dissonanzas avant la nominaziun
Ordavant avevan adherents da Bernie Sanders empruvà d'occupar il center da medias dals democrats al di da partida a Philadelphia. La polizia ha chatschà davent plirs 10 delegads.
La finala han quels protestà a moda paschaivla davant ils locals da lavur e discurrì da «malobedientscha civila» ch'els prestian. Els han crititgà che la partida democratica haja torpedà il process da las preelecziuns. Sanders n'haja davent da l'entschatta gì nagina schanza, uschia l’argumentaziun da ses adherents.
RR novitads 06:00
