Il president columbian, Juan Manuel Santos spera anc adina sin ina cunvegna en ses pajais sidamerican. La cunvegna ch'el aveva laschà elavurar per far pasch cun ils rebels da la Farc aveva fatg naufragi.
Reacziun dal president
Baud la damaun haja il president da la Columbia Juan Manuel Santos intervegnì ch'el haja survegnì il Premi Nobel da la pasch - ed el saja stà surprais. Quai ha annunzià il comité dal premi Nobel.
Santos sez a scrit curt suenter sin Twitter ch'el acceptia il premi Nobel en num dal pievel columbian. Quel haja patì uschè bler en questa guerra.
En la Columbia regia dapi passa 50 onns ina guerra tranter ils rebels da la Farc ed il stadi. Avant curt ha il suveran columbian refusà ina cunvegna da pasch elavurada da Santos ensemen cun la Farc. Il process da pasch cuntinuescha dentant.
Passa 370 candidats per quest premi
La giuria ad Oslo n'ha betg gì simpel. Ella ha stuì sa decider tranter in dumber da record da candidats. En tut eran 228 persunas e 148 organisaziuns nominadas per il Premi Nobel. Mo paucas da quellas nominaziuns eran enconuschentas gia avant la tscherna.
L'onn passà avevan ils tschintg giurors dà il premi al quartet da la Tunesia per il dialog naziunal. Il Premi Nobel è dotà cun 8 milliuns curunas svedaisas - quai èn radund 908'000 francs svizzers.
RR novitads 11:00
