Siglir tar il cuntegn

Header

cuntegn

Exteriur Incendis en il Sid da l’Europa

En Frantscha, l'Italia ed il Portugal cumbattan pumpiers anc adina cunter incendis. A la Côte d'Azur han las autoritads evacuà millis d'abitants e turists.

A la costa da la mar mediterrana ardi dapi dis. En la destinaziun da vacanzas Côte d’Azur èn vegnidas evacuadas millis abitants e turists. A Bormes-les-Mimosas tranter Hyères e St. Tropez han las autoritads laschà rumir chasas e campadis.

Var 10’000 persunas han tenor las autoritads localas stuì pernottar en alloschis d’urgenza. Sco Franceinfo ha rapportà sajan en il sidost dal pajas e sin la insla Corsica 50 kilometers quadrat terren ars. La gievgia èsi reussi als pumpiers da franar la gronda part dals fieus. Pervia da la sitgira teman ils pumpiers dentant, ch’ils incendis savessan puspè s’envidar.

Arrestà divers incendiaris en Italia

La chalira permanenta e ferm vent da sidvest engrevgeschan en l’Italia il cumbat cunter ils incendis da guaud e bostgaglia. Quasi en tut las regiuns hai dà incendis. Spezialmain pertutgadas èn las regiuns Sicilia e Campania. A Messina en Sicilia ha la polizia arrestà trais minorens ch’èn vegnids traplads da metter fieu.

Fieus en il Portugal anc betg sut controlla

Anc betg sut controlla èn ils incendis en il Portugal: Radund 3200 pumpiers èn anc adina en acziun. En la vischnanca Sertã en la regiun da Castelo Branco cumbattan 920 pumpiers il pli grond fieu.

Eucaliptus è en ils guauds dal Portugal ina da las plantas la pli derasada. Tranter auter sajan quellas plantas responsablas per il derasar svelt dals fieus. Tras incendis da guaud en il center dal pajais èn il zercladur 64 persunas mortas e ulteriuras 250 persunas vegnidas blessadas.

RR novitads 14:00

Artitgels legids il pli savens