Il Cussegl federal examinescha las opziuns legalas per scumandar l'organisaziun radical-islamica palestinaisa, sco el ha communitgà. En il passà aveva quest'idea fatg naufragi en il parlament. Suenter las attatgas da la Hamas è il vent dentant sa midà.
Vitiers ha il Cussegl federal installà ina task force per il Proxim Orient. Quella haja l'incumbensa da far las analisas necessarias, per pudair prender decisiuns en connex cun ils schabetgs en l'Israel ed en il territori palestinais occupà, hai num en la communicaziun.
Pretensiun unanima da la cumissiun
Il mardi ha la Cumissiun per la politica da segirezza dal Cussegl naziunal pretendì, che la Svizra classifitgeschia l’organisaziun radical-islamica Hamas sco organisaziun terroristica. Quai ha la cumissiun decidì unanimamain. La cumissiun ha approvà duas intervenziuns parlamentaras en quest senn. Il president da la cumissiun Mauro Tuena da la PPS ha ditg che quai che saja capità la sonda saja cleramain in’attatga terroristica. Per la cumissiun vai era per la segirezza en Svizra. Per che las autoritads da segirezza possia s’activar stoppia la Hamas vegnir classifitgada sco organisaziun terroristica.
Era parlamentaris grischuns per scumond
Ch'i saja ussa necessari d'agir cunter l’organisaziun radical-islamica Hamas, da quai èn era persvas ils blers parlamentaris grischuns. Betg emblidar dastgian ins dentant la populaziun civila, tant l'israeliana sco era la palestinaisa, che stoppia ussa endirar las consequenzas dal conflict.
Demonstraziun a Turitg
A Turitg èn passa 1'000 persunas idas sin via il mardi saira per exprimer lur solidaritad cun l'Israel e ses abitants ed abitantas. L'appel da sa radunar ha fatg la Cuminanza israelita da Turitg. Il president da l'organisaziun ha manegià ch'als pleds da solidaritad stoppian uss era suandar acziuns. Il Cussegl federal stoppia finalmain dir cler e net che la Hamas saja in'organisaziun terroristica.
