Siglir tar il cuntegn

Header

cuntegn

Exteriur La Belgia ha surdà Abdeslam a la Frantscha

L’attentader probabel da Paris, Salah Abdesalam, è puspè en Frantscha. La procura publica beltga ha confermà quai. Abdeslam era vegni arrestà ils 18 da mars a Brüssel. El duai esser stà cumpiglià a las attatgas da Paris cun 130 morts.

Las autoritads da la Belgia han extradì il probabel attentader da Paris, Salah Abdeslam, a la Frantscha. Ina pledadra da la procura publica generala beltga ha conferma rapports da gasettas da la Belgia.

Abdselam èra vegni arrestà ils 18 da mars suenter investigaziuns da plirs mais a Brüssel. L’um da 26 onns duai esser cumpiglià als attentats da Paris ils 13 da november 2015 nua che 130 persunas èn mortas. Il frar vegl da Abdeslam aveva siglientà sasez en l’aria tar in Café a Paris.

Il mument vegn intercuri sche Abdeslam è era cumpiglià en attents a Brüssel

Sche el era cumpiglià en las preparativas dals attentats a Brüssel ils 22 da mars n’è il mument anc betg sclerì. Tenor ils investigaders a Brüssel han cumplizis da Abdselam commess las attatgas ils 22 da mars nua che 35 persunas han pers la vita. Per omaduas attatgas èn sa mussads responsabels la milissa da terror Stadi islamic.

Abdselam era en praschun en ina citad el nord da la Belgia. Avant sia arrestaziun curt avant las attatgas da terror a Brüssel era el ina dals pli tschertgads suspectads terrorists en l’Europa.

RR novitads 11:00

Artitgels legids il pli savens