Siglir tar il cuntegn

Header

cuntegn

Exteriur La votaziun è a fin – Rajoy defenda la violenza

En la Catalugna è la votaziun dispitaivla per l'independenza da la Spagna ida a fin. In di sumbrivà da violenza da la polizia.

Malgrà las mesiras da la polizia spagnola per evitar la votaziun hajan ils blers locals electorals pudì vegnir duvrads, communitgescha la regenza catalana.

Suenter 11 uras hajan ils locals serrà sco previs a las 20:00.

La dumbraziun da las vuschs vegnia a cuzzar in mument, uschia las autoritads regiunalas.Tenor las ultimas cifras dal ministeri da sanadad regiunal èn vegnidas blessadas alamin 844 persunas. Policists hajan agì cun projectils da gumma e bastuns.

Rajoy defenda las acziuns da la polizia

Il prim-minister spagnol Mariano Rajoy ha entant defendì l'agir violent da la polizia. En ina posiziun ha el dà la culpa a la regenza regiunala catalana per las scenas da violenza avant ils locals electorals. La regenza centrala haja sulet fatg ses duair.

L'unitad da la Spagna stoppia ussa tant pli spert puspè vegnir restabilisada. Rajoy ha plinavant annunzià in inscunter cun tut las partidas politicas per discutar davart l'avegnir communabel.

Violenza massiva e cravals

La polizia è intervegnida cun violenza massiva per impedir la votaziun davart l'independenza da la regiun. En differents lieus hai dà cravals. A Barcelona ha la polizia sajettà cun projectils da gumma sin votants.

La regenza spagnola aveva tramess radund 4'000 policists en la Catalugna per evitar la votaziun davart l'independenza.

Ella che discurra.
Legenda: Soraya Saez de Santamaria, la vice-scheffa da la regenza spagnola. Keystone

La regenza centrala spagnola a Madrid aveva intimà la regenza da la Catalugna da terminar la votaziun. La votaziun saja ina farsa. La regenza catalana saja responsabla suletta per tut quai che schabegia questa dumengia e per tut quai che vegnia anc a schabegiar.

La regenza regiunala catalana discurra da «vargugna»

Il schef da la regenza separatistica da la Catalugna, Carles Puigdemont, ha condemnà la polizia spagnola per duvrar projectils da gumma encunter votantas e votants. Anc curt suenter mezdi ha ditg Puigdemont vers schurnalists:

El amez microfons.
Legenda: Carles Puigdemont (cun cravatta), il president catalan. Keystone
Igl è cler, ch'il diever irresponsabel da violenza davart il stadi spagnol na vegn betg a tegnair si ils Catalans.
Autur: Carles Puigdemont schef da regenza regiunala

A l'adressa da la regenza spagnola sut la batgetta dal schef da regenza ha Puigdemont agiuntà, ch'igl saja vegnì ditg tut e che «la vargugna vegn a persequitar els per etern».

Ils cedels sin ina biga.
Legenda: Ils cedels da votar en Catalugna: «Vulais vus la Catalugna sco stadi independent en la furma dad ina republica?» Keystone

Impedir la votaziun a tutta forza

Gia l'avantmezdi saja la polizia penetrada cun sfratgar las fanestras en il local da vuschar nua ch'il schef da la regenza regiunala haja vulì dar giu sia vusch.

En differents locals da vuschar aveva la polizia spagnola confiscà urnas e cedels da vuschar. En ulteriuras citads catalanas aveva la polizia per part bloccà las entradas dals locals electrorals u serrà els gia avant il di da votaziun.

RR novitads 06:00++

Artitgels legids il pli savens