«Cun la ceremonia da cumià èn las regurdientschas alertas», di Stefan Brändle, il schurnalist svizzer che viva e lavura dapi 25 onns a Paris. E tuttina sentian ins, co tuts sa sprovan che la vita possia puspè nascher.
«Na dar suenter: ni a la tema ni a l'odi.» Quai è l'appel dal president François Hollande. E tuttina: cun sia empermischun da vulair cumbatter e fin la fin destruir ils fanatichers dal Stadi islamic, restia la malsegirtad tar ils Franzos, uschia Brändle.
Ed era igl esser attent resti. «Quai è da sentir, sch’ins prenda la metro ni sesa en il bus.» Pervia da la tema d'ulteriurs acts da terrur, desistian anc adina blers sin il traffic public e prefereschian l'agen auto da vegnir en la citad da Paris. Franzosas e Franzos sajan en mintga cas conscients ch'il privel da terrur na saja anc ditg betg dumagnà e superà.