Siglir tar il cuntegn

Header

cuntegn

Exteriur Mexico: Terra ha stremblì cun fermezza dad 8,1

Il sid dal Mexico è vegnì scurlattà il venderdi notg dal pli ferm terratrembel en la regiun dapi passa 80 onns.

Pervi dal terratrembel sajan vegnidas per la vita almain 27 persunas en il Mexico ed il pajais vischin Guatemala, rapportescha BBC online citond il guvernatur dad in stadi mexican. Il terratrembel è er stà da sentir en la chapitala Mexico-City. Perditgas han publitgà en las medias socialas maletgs e videos da gronds donns.

carta
Legenda: Davant la costa dal sid dal Mexico hai dà in terratrembel sutmarin. Keystone

Terra strembla en profunditad da 33 kilometers

Il terratrembel saja stà radund 120 kilometers avant la costa dal stadi Chiapas en ina profunditad da 33 kilometers. Il center american per l'observaziun geologica ha registrà il terratrembel cun ina fermezza dad 8,0. Il servetsch seismologic mexican discurra d'in terratrembel dad 8,4.

Suenter il emprim terratrembel èn vegnids registrads plirs terratrembels main ferms cun fermezzas tranter 4,3 enfin 5,7.

Tsunami da be 70 centimeters autezza n'ha betg fatgs quitads

Pervi dal terratrembel avevan las autoritads avertì dad undas da tsunami. Tenor l'agentura da novitads Reuters ha bain cuntanschì in tsunami la costa mexicana. Quel saja stà dentant be 70 centimeters aut e quai n'haja betg fat quitads, citescha Reuters il president mexican Enrique Pena Nieto.

Indicaziuns uffizialas davart unfrendas u donns na datti anc betg.

RR novitads 07:30++

Artitgels legids il pli savens