Siglir tar il cuntegn

Header

cuntegn

Exteriur Nova schanza per pasch en Columbia

L'atmosfera en la chapitala cubana Havanna saja optimistica, ha scrit sin Twitter il schef dals rebels. Il president da stadi columbian, Juan Manuel Santos, ha supplitgà ils delegads d'accellerar las tractativas uschia ch'els possian bainprest suttscriver la cunvegna.

L'emprima versiun da la cunvegna da pasch avevan ils Columbians refusà il cumenzament d'october en in referendum.

Il president columbian ha da curt survegnì il Premi Nobel per la pasch pervi da sia bregia per elavurar il contract da pasch cun la FARC. El sa sprova ussa fitg da surlavurar il contract. El maina vinavant discurs cun la FARC sco era cun l'opposiziun e cun represchentants da la populaziun per chattar ina via or da la crisa.

Ils adversaris crititgeschan tranter auter che la Farc duai pudair sa participar sco partida a la politica.

45'000 sparids

La FARC aveva cumenzà il 1964 a cumbatter vers la regenza e gronds proprietaris da terren. En il conflict eran era autras gruppaziuns involvidas, sco per exempel la gruppa da guerilla ELN, paramilitars dretgs, e la mafia da drogas. Durant ils ultims decennis èn vegnidas mazzadas dapli che 260'000 persunas e passa 45'000 èn anc adina sparidas.

La regenza columbiana vul era entschaiver tractativas cun la segund gronda gruppaziun da rebels, la ELN.

RR novitads 11:00

Artitgels legids il pli savens