Quai ch'è confermà uffizialmain
- En in center da cumpra a Minca hai dà venderdi saira ina sajettada.
- La procura publica da Minca parta d'in act d'amoc e betg d'in act terroristic.
- La polizia conferma 9 unfrendas mortas e 27 blessads; quai surtut giuvenils.
- L'attentader ha fatg suicidi. I sa tracta dad in Tudestg da 18 onns cun ragischs iranaisas.
- Tenor il Departament svizzer d'affars exteriurs n'èn naginas burgais svizzers pertutgads directamain da l'attatga a Minca.
En la chombra dal giuven da 18 onns ch'a fatg l'attatga a Minca n'ha la polizia chattà nagins fastizs per in connex cun terror islamistic. Quai han las autoritads ditg en ina conferenza da medias la sonda. Però haja la polizia chattà documents che sa fatschentian cun attatgas d'amoc. Tar l'attentader ha la polizia chattà ina pistola e 300 patronas muniziun latiers.
L'attatgader na saja era betg stà registrà u enconuschent al servetsch secret tudestg, ha ditg il minister da l'intern Thomas de Maizière suenter in inscunter da segirezza sin livel naziunal.
Tar las unfrendas sa tracti surtut da persunas giuvnas; per la gronda part en la vegliadetgna da sut 20 onns.
Ils svilups dal venderdi
En il center da cumpra Olimpia (#OEZ) a Minca hai dà morts e blessads. Quai ha confermà la polizia da Minca. La sajettada ha cumenzà avant ina filiala da McDonalds en il center da cumpra. Tenor indicaziuns uffizialas èn 2'300 policists en acziun. Sch'i sa tracta dad in act terroristic u dad in amoc n'è anc betg cler, sco las autoritads rapportan. Percunter valitescha il president franzos François Hollande l'attatga cleramain sco act terroristic. Il president dals Stadis Unids Barack Obama ha condemnà l'attatga e garantì agid a la Germania. Il cabinet da segirezza tudestg sa raduna sonda a Berlin.
Fauss alarm en il center
Durant la saira hai era dà ina acziun pli gronda da la polizia en il center da la citad sper il hotel Stachus. I sa tractava dentant d’in fauss alarm. La polizia era cun in engaschament cumplain al lieu, suenter ch’i ha dà panica. Persunas hajan sbragì e bragì.
Il center da cumpra nua che l'attatga è succedida è localisà amez in quartier abità. La polizia ha avertì ils abitants da betg bandunar lur abitaziuns. Il center da cumpra è vegnì evacuà. L'entir center da cumpra è barricadisà da patruglias armadas da la polizia.
Traffic public interrut e bloccadas da via
La metro è vegnida serrada. La staziun principala da Minca è vegnida evacuada, era il traffic da la viafier enturn Minca e cumplet interrut, annunzia la Deutsche Bahn. La polizia ha bloccà vias ed er helicopters èn en servetsch. Il primminister da la Baviera Horst Seehofer ed il minister da l'intern Joachim Herrmann han annunzià per questa saira in inscunter da crisa.
RR novitads ed actualitad
L'attatgader da Minca n'era betg enconuschent al servetsch secret tudestg.
Quai a ditg il minister da l'intern Thomas de Maizière suenter in inscunter da segirezza sin livel naziunal. Ed el a manegià ch'i saja memia baud - da vulair debattar davart adattaziuns da leschas suenter l'attatga.
Avant aveva la chanceliera Angela Merkel exprimì sia cumpassiun cun ils parents da las unfrendas da Minca. Ed ella a ludà las stentas da la polizia e da las forzas da salvament a Minca.
