L'Unesco fa quitads per la pasch e tema ulteriurs conflicts en connex cun la mancanza d'aua che crescha ad in crescher. Per garantir la pasch stoppia la cuminanza internaziunala agir svelt e proteger las resursas. Ultra da quai stoppia la collavuraziun regiunala e globala vegnir rinforzada, ha ditg la directura generala da l'Unesco Audrey Azoulay.
Mesadad da la populaziun mundiala patescha
Tenor il rapport d'aua patescha bun la mesadad da la populaziun globala almain en tschertas stagiuns d'ina ferma mancanza d'aua. Passa duas milliardas persunas n'han nagin access ad aua da baiver schubra. 3,5 milliardas persunas n'han nagins indrizs sanitars schubers.
Ch'il mund dovria adina dapli aua n'haja betg en emprima lingia da far cun il fatg ch'i dettia adina dapli persunas sin il mund: En regiuns nua che la populaziun creschia il pli fitg, dovria la singula persuna savens il pli pauc aua, èsi da leger en il rapport.
Ina da las raschuns principalas che la populaziun mundiala dovra adina dapli aua è che las disas da mangiar èn sa midadas. I dovra entras quai dapli aua per l'agricultura e l'industria.
Consequenzas negativas per buobas e dunnas
La mancanza d'aua ha era consequenzas gravantas per buobas e dunnas. Consequenzas hai cunzunt per la scolaziun e furmaziun da quellas. En bleras regiuns champestras sajan las buobas e las dunnas responsablas ch'aua vegnia en las chasadas, rapporta l'Unesco. Quai dovria bler temp. La mancanza d'aua saja plinavant in dals motors per la migraziun.
Anc n'haja la mancanza d'aua betg provocà conflicts significants, cuntrari a las spetgas. Ella haja però in grond potenzial da provocar dispittas. Quai sa mussa actualmain cunzunt en la zona da Sahel en l'Africa, nua ch'i dat dispitas davart l'access ad aua e terren fritgaivel. Il privel da guerras pervia da la mancanza d'aua saja però real. Sin tut il mund partan passa 150 pajais lur resursas d'aua cun pajais vischins. Da quels han fin ussa pir 24 fatg cunvegnas l'in cun l'auter co agir e proceder en connex cun las resursas d'aua.