Siglir tar il cuntegn

Header

cuntegn

Exteriur Reducì il stgalim d'alarm en la Gronda Britannia

Las autoridads en la Gronda Britannia han pudì reducir il stgalim d'alarm per il ristg da terror da «critic» a «serius». Per la fin d'emna èn pli che 1'000 policists armads en servetsch per proteger occurenzas d'ulteriuras attatgas.

En la Gronda Britannia han las autoritads reducì il stgalim d’alarm per il ristg da terror da «critic» a «serius». Per consequenza vegnan ils schuldads che sustegan actualmain la polizia, betg pli ad esser preschents sin via davent da glindesdi. Quai saja il resultat da la lavur intensiva da la polizia da las ultimas 24 uras, ha communitgà la primministra Theresa May.

Suenter l’attatga a Manchester da glindesdi valeva en il pajais il stgalim d’alarm il pli aut, perquai ch’ins temeva ulteriuras attatgas. Il stgalim d’alarm «critic» vala, sch’ina attatga da terror vegn spetgada directamain. Il stgalim «serius» munta, ch’ina attatga è fitg probabla.

Arrestà ulteriurs eventuals cumplizis

La polizia ha communitgà d’avair arrestà 2 ulteriurs eventuals cumplizis da l’attatgader. Plinavant haja ella intercurì pliras abitaziuns. Da las 13 persunas ch’èn vegnidas arrestadas dapi glindesdi, èn ussa anc 11 en arrest.

Gronda preschientscha da polizia en Gronda Britannia

Specialists en la Gronda Britannia han examinà la segirezza da var 1'300 occurrenzas planisadas. Pli che 1000 policists armads èn questa fin d'emna en servetsch per proteger occurenzas. Ultra da quai ha la polizia sustegn da schuldads.

Ina da las grondas occurrenzas che dovran protecziun, è il final da la cuppa da ballape tranter Arsenal e Chelsea. A Londra spetgan ins pli che 80-milli aspectaturs per quest final, tranter auter era il prinzi William ed il schef da la partida Labour Jeremy Corbin.

Betg laschar gudagnar ils terrorists

La polizia cunter il terror en la Gronda Britannia ha però era supplitgà la populaziun da giudair la fin d’emna prolungada e da betg laschar gudagnar ils terrorist cun avair tema d’autras attatgas. Glindesdi che vegn è in firà èn la Gronda Bretagna.

RR novitads 16:00

Artitgels legids il pli savens