Siglir tar il cuntegn

Header

cuntegn

Exteriur Scandal da charn veglia en Brasilia

Il pajais duai avair vendì charn ida a mal. Sch'era l'export è pertutga, n'è il mument betg cler.

  • In scandal da tgarn ida a mal scurlatta il pli grond pajais exportader da charn.
  • Fin uss èn radund 20 persunas vegnidas arrestadas en quest connex.
  • Ellas duajn avair organisà la vendita da charn veglia maschadada cun charn frestga.
  • Tenor la regenza sajan be 21 dals 4'800 lieus da producziun pertutgads.

Export da charn

Avrir la box Serrar la box

Cun exportar charn gudogna la Brasilia mintg'onn passa 14 milliardas dollars. Ils Stadis Unids avevan suenter lungas discussiuns avert il martgà per charn brasiliana il fanadur 2016. En vista al scandal ha il president Michel Temer tegnì pliras sesidas da crisa.

La regenza brasiliana emprova da quietar la situaziun suenter che plirs cas da charn ida a mal èn vegnids a la glisch. Sco il president brasilian Michel Temer ha ditg a l'inscunter cun plirs represchentants da pajais ch'importeschan charn brasiliana sajan be paucas interpresas responsablas per questas irregularitads.

Ed ils exports?

En connex cun las investigaziuns sajan 33 controlladers da victualias vegnids relaschads. Tenor indicaziuns dal ministeri d’agricultura èn fin ussa trais lieus da producziun vegnids serrads e 21 ulteriurs sajan sut observaziun speziala. Pertutgà saja er il pli grond producent da charn dal mund JBS.

Sche l’export è er pertutgà u betg, n’è il mument anc intschert. La regenza brasiliana ha suttastritgà ch’i na dettia nagins ristgs pli gronds per ils bunamain 160 pajais importaders da charn brasiliana.

L’ambassadur da la Svizra en Brasilia André Regli ha ditg che la situaziun saja alarmanta. Cun mangiativas na duaja betg vegnir giugà.

La polizia federala investighescha en chaussa. Radund 1’100 policists sajan en acziun.

RR novitads 06:00

Artitgels legids il pli savens