Siglir tar il cuntegn

Header

cuntegn

Exteriur Set unfrendas tar attatga da terror a Londra

Entamez Londra è in auto da furniziun charrà la sonda saira en peduns, silsuenter han ils attatgaders cuntinuà cun attatgar visitaders d’ustarias en ils conturns. Entant ha la primministra Theresa May preschentà in plan per fruntar il terrorissem e la polizia ha arrestà 12 persunas.

Autos da polizia sin ina via la notg
Legenda: La polizia da Londra ha bloccà suenter l’attatga plirs spazis pli gronds en la citad. Keystone

Sin la London Bridge entamez la chapitala britannica, è in auto da furniziun charrà en ina fulla da glieud. Silsuenter èn ils attatgaders charrads paucs tschients meters fin al Borough Market, in quartier per ir en sortida. Là han ils trais umens attatgà persunas en ustarias. La finala ha la polizia mazzà ils trais attatgaders. En connex cun l'attentat ha la polizia britannica entant arrestà 12 persunas en l'ost da Londra.

Attatgaders han fatg finta

La polizia ha sajettà giu ils attatgaders al Borough Market otg minutas suenter avair survegnì l'emprim clom d'agid. Ils attatgaders hajan purtà vestas che vesevan ora sco sch'ellas cuntegnessan material explosiv, ha la polizia era communitgà. Quai sajan dentant mo stadas attrapas. Tenor la schefa da polizia, Cressida Dick, èn ils attatgaders anc betg identifitgads.

Dasper las unfrendas blers blessads

La polizia britannica discurra actualmain da set unfrendas. L'emprim aveva ella anc discurrì da sis unfrendas. Tenor ils servetschs da salvament èn 48 persunas vegnidas ospitalisadas cun blessuras. Pliras persunas cun blessuras main grevas hajan ins tractà ambulant al lieu, han ils servetschs da salvament communitgà sin Twitter.

Il Departament federal per affars exteriurs n'a il mument naginas infurmaziuns che persunas svizras sajan pertutgadas.

Plan per cumbatter il terrorissem

La primministra Theresa May ha suenter ina sesida da crisa preschentà in plan da quatter puncts per fruntar il terrorissem:

  • la derasaziun da l'ideologia islama stoppia vegnir franada
  • l'internet – il spazi virtual stoppia vegnir controllà meglier
  • als terrorists stoppia vegnir retratg il territori en il mund real – tranter auter cun attatgar basas dal IS
  • la strategia antiterror da la Gronda Britannia stoppia vegnir surlavurada

Cumbat electoral interrut

Pliras partidas politicas da la Gronda Britannia han interrut il cumbat electoral. Damaun vegnia quel dentant a cuntinuar, ha communitgà la primministra. Gievgia che vegn han lieu elecziuns da parlament anticipadas en il pajais.

Medem muster

L'attatga sin la London Bridge fa endamen in'attatga dal mars passà, sin la Westminster Bridge. Lura era in um da 52 onns charrà en peduns, avant che stilettar in policist betg armà. Tar quest'attatga eran sis persunas mortas, l'attatgader aveva la polizia sajettà giu.

Pleds da tristezia e consolaziun

Il president da Londra Sadiq Kahn a discurrì d'ina attatga intenziunada sin persunas innocentas, abitants da Londra e visitaders. Il president american Donald Trump ha telefonà cun la primministra Theresa May anc la notg, ed exprimì sia cumpassiun. E che la Frantscha sentia cun la Gronda Britannia suenter la nova tragedia, ha scrit sin Twitter il president franzos Emmanuel Macron.

RR novitads 06:00++

Artitgels legids il pli savens