La votaziun da la dumengia davart il referendum saja stada senza legitimitad e perquai restia sco unica pussibilità, dad annullar ella. Quai ha ditg Bülent Tezcan, il vice da la pli gronda partida d’opposiziun CHP en Tirchia, suenter ch’el ha inoltrà uffizialmain recurs cunter las votaziuns davart la midada da constituziun.
La CHP argumentescha, che la cumissiun electorala na saja betg stada independenta e ch’i haja dà bleras irregularitads. Per exempel sajan vegnis dumbrads documents da votaziun senza in bul uffizial, quai che saja illegal.
Era la cumissiun da l’Uniun europeica sustegn l’opposiziun tirca. Las autoritads duain examinar a moda transparenta las irregularitads. Il ministeri da l'exteriur tirc refusa percunter la critica d'observaders da l'Organisaziun per la segirezza e la collavuraziun en l'Europa.
En il fratemp ha il parlament ad Ankara consentì a la prolungaziun dal stadi d’urgenza per trais mais. Il stadi d’urgenza vala uss fin almain ils 19 da fanadur.
RR novitads 20:00
