Siglir tar il cuntegn

Header

cuntegn

Exteriur Trump è saramentà ed appellescha al patriotissem

Il nov president dals Stadis Unids da l'America Donald Trump e ses vice Mike Pence èn saramentads. En ses pled ha Trump appellà al patriotissem american, independent da la colur da la pel.

El ha annunzià da vulair cumbatter l'islam radical ensemen cun il mund ed ina giada dapli ha Trump suttastritgà sia doctrin da la politica exteriura: America First. Cumprai american e pladì persunal american, uschia las duas reglas da Trump. Per la ceremonia da saramentaziun a Washington D.C. eran radund 800'000 persunas avant il capitol.

Reacziuns maschadadas

Il pled da Trump per si'introducziun en l'uffizi ha distatgà reacziuns maschadadas. Ils presidents dal Mexico e da l'Ucraina han fatg a savair ch'els sperian sin ina buna collavuraziun. Il papa Francestg ha appelà al nov president da s'occupar dals povers e stgatschads. Il minister d'economia tudestg, Sigmar Gabriel, ha ditg ch'il pled da Trump avevi «tuns naziunalistics». L'elecziun da Trump saja il resultat d'ina greva radicalisaziun.

Oz entrain nus en ina era da la malsegirtad.
Autur: François Hollandepresident da la Frantscha

La ceremonia da saramentaziun

Venderdi, ils 20 da schaner a las 18:00 uras èsi stà uschè lunsch. Donald Trump, il 45avel president dals Stadis Unids da l'America è vegnì saramentà. Las mesiras da segirezza èn stadas enormas, surtut er perquai ch'igl èn annunziadas demonstraziuns, per part era nunlubidas.

Il program:

En il decurs dal suentermezdi èn arrivads Donald Trump e sia dunna Melania en la Chas'alva, nua ch'il president partent Barack Obama e sia dunna Michelle ha beneventà Trump.

Saramentaziun dal president e dal vicepresident

Enturn las 17:30 (temp svizzer) è vegnì saramentà il vicepresident, Mike Pence ed a las 18:00 è lura Donald Trump stà en roda. Ses emprim pled sco president è vegnì spetgà cun tensiun. L'um da 70 onns aveva annunzià ch'el veglia s'orientar en ses pled a quels da ses antecessurs Ronald Reagan e John F. Kennedy.

Intginas cifras:

Avrir la box Serrar la box
  • 3 mais hai durà per construir la plattafurma cun tribuna davant il Capitol
  • la plattafurma ha ina surfatscha da 930 m2
  • 28'000 policists èn sin il plaz durant la saramentaziun
  • bun 1'600 giasts impurtants (V.I.P.) èn envidads
  • ina carta d'access per in plaz davant il Capitol custa 350 fin 6'250 dollars
  • en tut quintan ins cun radund 900'000 aspectaturs

Artitgels legids il pli savens