Danovamain ha il president american Donald Trump avertì la Corea dal nord suenter che Pjöngjang ha smanatschà da vulair sajettar rachetas sin l'insla Guam. Ins preparia diversas opziuns ha ditg Trump. Forsa na sajan ses avertiments betg stads clers avunda. Sch'il schef da stadi Kim Jong Un fetschia insatge als Stadis Unids capitia insatge che nagin haja vis fin ussa ha ditg Trump en ses club da golf a New Jersey.
Trump aveva ditg il mardi ch'el vegnia a reagir cun «fieu e ravgia» sin las provocaziuns da Pjöngjang. Sin quai ha la Corea dal Nord reagì cun smanatschas sin Guam. Sin las inslas en il Pacific dal vest sa chattan radund 6'000 schuldads dals Stadis Unids.
En circuls da la regenza americana hai gì num che las remartgas da Trump na sajan betg stadas contestadas e n'hajan er betg gidà en chaussa. Il minister da l'exteriur vegnia pli tard a sa spruvar da deescalar la situaziun. El na craja betg che la Corea dal Nord pericliteschia directamain ils Stadis Unids. Il dictatur Kim Jong Un na chapeschia nagin linguatg diplomatic. Uschia haja Trump discurrì en in tun fitg cler ch'era el chapeschia.
Mattis emprova da deescalar
Il minister da defensiun american Jim Mattis avertescha d'ina guerra cun la Corea dal nord. En vista da l'escalaziun verbala en il conflict ha Mattis ditg ch'ina guerra fissia catastrofala. El mettia vinavant sin la diplomazia.
RR novitads 06:00