Sin l'entir mund èn uschè bleras persunas sin la fugia sco anc mai. Actualmain èn quai 110 milliuns persunas, pia 10 milliuns dapli ch'anc avant in onn. Quai resulta dad in rapport da l'ovra d'agid per fugitivs da l'ONU UNHCR.
Las persunas fugian tranter auter pervia da conflicts, persecuziun, discriminaziun u violenza, ha ditg Filippo Grandi, il manader da l'UNHCR, a Genevra. Las consequenzas da la midada dal clima vegnissan savens vitiers. Plinavant saja il conflict en il Sudan er in motiv per il dumber pli aut da fugitivs. Sulet là sajan dapi l'avrigl bunamain 2 milliuns persunas fugì.
