Wolodimir Selenski ha mesemna suentermezdi pretendì en ses pled al WEF a Tavau ch'i vegnia fatg ina fin cun il president russ Wladimir Putin. Lez veglia ina guerra infinita e na vegnia betg a sa midar: Il president da l'Ucraina n'ha dentant betg mo duvrà pleds fitg clers envers Putin – mabain era envers il vest.
Ins na possia betg discurrer da sancziuns sch'i vegnia gnanc franà la furniziun da rauba che vegn duvrada da la Russia per producir armas. El saja bain engraziaivel per mintga sancziun, dentant sajan cumponentas dal vest integradas en quasi mintga arma russa. Selenski ha ina giada dapli punctuà ch'i na giaja en questa guerra betg mo per l'Ucraina, mabain era per defender las valurs dal vest – e perquai saja essenzial ch'il mund sustegnia l'armada ucranaisa per far ina fin a Putin – perquai che lez na saja betg interessà vi dad ina schliaziun paschaivla, anzi, el saja in animal da rapina che n'enconuschia nagina fin.
Selenski ha fidanza en ses pievel
Sin la dumonda, co l’atmosfera saja en l’Ucraina suenter dus onns guerra accentuescha Selenski, che l’Ucraina e ses pievel vegnian mai a perdunar a Putin u a ses sustegniders.
El saja segirs che la populaziun ucranaisa cumbattia vinavant a moda persvadenta. «Sche nus stain ensemen tuts per isolar Putin, lura pudain nus instradar pass politics per evitar che la guerra vegnia extendida en auters pajais», uschia Selenski.
A la fin dal pled da Wolodimir Selenski hai dà grond applaus e standing ovations en la sala gronda dal center da congress.
In viadi secret cun la Viafier retica
Senza gronds tuns è il president ucranais Wolodimir Selenski arrivà a Tavau – e quai cun la Viafier retica. Co Yvonne Dünser, responsabla per las medias tar la RhB, ha ditg encunter schurnal regiunal dad SRF, n’hajan els or da raschuns da segirezza betg savì ordavant tge passagier che vegn transportà fin a Tavau. Pir cura che Selenski saja arrivà a Landquart, saja stà cler da tgi ch’i sa tractia.
Svizra vul organisar conferenza da pasch
La Svizra veglia sustegnair la reconstrucziun da l'Ucraina ed organisar ina conferenza da pasch. Uschia veglia la Svizra far sia part per ina pasch durabla. Ils detagls per ina conferenza stoppian dentant anc vegnir sclerids en detagl. Responsabel saja il departament da l'exteriur dad Ignazio Cassis.
Nato sustegna conferenza da pasch
La Nato sustegna la conferenza da pasch per l’Ucraina ch’il president ucranais Wolodimir Selenski ha lantschà da sia visita en Svizra. En l’intervista cun SRF ha il secretari general da la Nato, Jens Stoltenberg, dentant suttastritgà ch’i saja inevitabel che la Russia vegnia baud u tard er integrada en l'entir process da pasch. Uss giaja persuenter che uschè blers pajais sco pussibel sajan perina, sco i pudess dar pasch en l’Ucraina. Stoltenberg na craja dentant betg che la China pudessi far part dal process da pasch – quai pervi dal partenadi cun la Russia.
