Immigraziun enritgescha vita culturala

Ina gronda part dals Svizzers èn da l’avis che l’immigraziun da persunas d’auters pajais enritgescha nossa varietad culturala. Tuttina èn dus terzs da l’opiniun ch’il naziunalissem en Europa crescha e che quest svilup saja negativ.

In giuvenil nair suna la trumbetta. Bild in Lightbox öffnen.

Legenda da maletgs: L'immigraziun d'estras enritgescha la vita culturala. Colourbox

Ina gronda part dals Svizzers che han participà al questiunari «Generation What?» beneventan l’immigraziun d’esters en Svizra. Persunas d’auters pajais enritgeschian nossa varietad culturala. Tuttina però fa il naziunalissem era quitads ad ina gronda part. Dus terzs dals participants Svizzers dal questiunari èn da l’opiniun ch’il naziunalissem creschia en Europa e che quai saja in svilup negativ. 16% dals Svizzers vesan quai svilup positiv ed ils auter 17% na vesan betg ch’il naziunalissem crescha.

Tge din noss vischins?

Sursiglir cuntegn supplementar

Generation What?

Il fanadur da l’onn passà ha RTR ensemen cun RSI e RSR ed auters emetturs europeans lantschà il questiunari «Generation What?» Passa 600’000 persunas en 30 pajais da l’Europa han respundì il questiunari. En Svizra han enfin ussa ver 6600 persunas respundì a las dumondas.

Il questiunari è anc avert enfin ils 26 d’avrigl.

Era en Germania cun 81%, Frantscha cun 75% ed en Italia cun 69% è la gronda part da la populaziun da l’avis ch’immigrants esters enritgeschian la vita culturala da lur pajais. Cun 78% èn surtut ils tudestgs preoccupads pervia ch’il naziunalissem creschia en Europa. Perencunter na vesan 30% dals talians betg ch’il naziunalissem crescha e 15% d’els che vesan ch’il naziunalissem crescha, valiteschan quest svilup positivamain.

En Frantscha è il tema naziunalissem gest fitg actual en connex cun l’elecziun d’in nov president ils 23 d’avrigl. Qua vesan 65% dals participants ch’il naziunalissem en Europa crescha e valiteschan quai negativamain. 22% na vesan betg ch’il naziunalissem creschia e 13% valiteschan il crescher dal naziunalissem sco positiv.

Sche ti vul guardar dapli detagls poss ti cliccar qua:
Resultats da «Generation What».

Optimistic u pessimistic en l'avegnir?