La regenza grischuna ha approvà il concept detaglià per las activitads en connex cun il giubileum «500 onns Stadi liber da las Trais Lias». Previs èn dis da tempra populara, tranter auter en las chapitalas istoricas Cuira, Tavau e Glion. Vitiers datti en l’entir chantun tribunas da poetry slam per giuvenils, in’exposiziun ambulanta e publicaziuns.
Il di da naschientscha
Ils 23 da settember 1524 èn s'unidas la «Lia da la Chadé» cun la chapitala istorica Cuira, la «Ligia Grischa» cun Glion e la «Lia da las Diesch Dretgiras» cun Tavau, ed èn daventadas il «Stadi liber da las Trais Lias». Quella data pon ins tenor l'archivari chantunal Reto Weiss vesair sco di da naschientscha dal chantun Grischun.
Il Stadi liber da las Trais Lias è il precursur direct dal chantun Grischun.
Giubileums èn per l'ina in motiv per svegliar puspè l'interess ed il discurs istoric – e pon per l'autra era furmar e rinforzar l'identitad da la populaziun. Quai conferma era Jon Domenic Parolini, il cusseglier guvernativ respunsabel. Cunzunt en temps da conflict sco oz saja impurtant da sensibilisar la populaziun davart l'atgna istorgia. Uschia poss'ins chapir meglier il preschent e furmar meglier il futur.
Tut quels che vesan la vopna grischuna, san quels e quellas che la vopna represchenta las Trais Lias?
Il raps sajan ina buna investiziun per questa lecziun d'istorgia a chaschun dal 500avel giubileum dal chantun, concluda il cussglier guvernativ respunsabel.
Avert per ulteriuras ideas
L’entir giubileum duai er avair plaz per autras occurrenzas culturalas – sco vernissaschas, musica, teater e prelecziuns. Uniuns ed instituziuns possian annunziar lur ideas, scriva il Departament d’educaziun, cultura e protecziun da l’ambient. Questas occurrenzas possian lura era profitar da sinergias, d’ina communicaziun cuminaivla e da la promoziun da la cultura. Il budget prevesì da 2 milliuns francs per il giubileum vegn or dal fondo da la lottaria naziunala.