Siglir tar il cuntegn

Header

cuntegn

Chantun 4 dis dapli chatscha - l'iniziant ha midà opiniun

Ils millis chatschaders grischuns èn tut auter ch'unids. Dacurt è in trio che s'engascha encunter la chatscha speziala vegnì bandischà da l'uniun grischuna. Uss rampluni vinavant. L'incumbensa ch'il Cussegl grond ha surdà a la regenza per prolungar la chatscha vegn cumbattida da l'incaricà sez.

audio
Bunura: L'iniziant dals 4 dis dapli chatscha ha midà opiniun
ord Actualitad dals 12.07.2016.
laschar ir. Durada: 4 minutas 1 Secunda.

Avant bun in onn han 65 deputads suttascrit l'incumbensa da Christian Kasper da prolungar la chatscha normala per 4 dis viaden en l'october. La regenza grischuna ha dentant elavurà il messadi e la debatta en il cussegl grond tractandada per la sessiun d'october. Lura na vegn il deputà liberaldemocrat da la Purtenza Christian Kasper betg pli a sustegnair sia atgna incumbensa.

Jau sun arrivà en in dilemma, dapli na ditg jau betg.
Autur: Christian Kasper President da la fracziun da chatschadurs en il cussegl grond e suprastant da l'Uniun grischuna da chatschadurs

Christian Kasper na vul betg s'exprimer daco exact ch'el haja midà opiniun. Sper il presidi da la fracziun da chatschaders è el era en la suprastanza da l'Uniun grischuna dals chatschaders da patenta. En la debatta da la sessiun d’october vegni el a represchentar l’opiniun da la maioritad da l’uniun chantunala – vul dir che Kasper na stat betg pli davos l’introducziun da la chatscha d’october ch’el ha sez mess en moviment. Renatus Casutt, l’anteriur deputà e commember da l’iniziativa encunter la chatscha speziala, lascha quest agir be scurlattar il chau.

Cun la proposta da la regenza cumenza l'entira discussiun puspè

La regenza ha dentant elavurà il messadi per prolungar la chatscha normala per 4 dis. Quel vul ella preschentar suenter las vacanzas da stad sco il cusseglier guvernativ Mario Cavigelli ha ditg, e Cavigelli relativescha che Kasper haja midà opiniun. Cun la proposta che la regenza suttamettia al parlament cumenzia la discussiun danovamain. Sch’ils 65 deputads ch’han suttascrit l’incumbensa da Kasper vesan er quai uschia, pudess quai esser ulteriura muniziun en questa debatta.

RR actualitad 07:00

Artitgels legids il pli savens