L'onn 2013 tutgava Wieland tar ils adversaris dal project per gieus olimpics en il Grischun l'onn 2022. El na saja dentant mai stà cunter gieus olimpics mabain be cunter singuls puncts dal project, uschia Andreas Wieland. Cunzunt tar las finanzas, la persistenza sco er concepts da traffic hajan da lez temps anc lascha bleras dumondas avertas.
Dapli persistenza entras gieus decentralisads
In dals puncts centrals, sper in budget cler e chapibel per tuts, è per Andreas Wieland la persistenza dals gieus. Quella vul el cuntanscher cun nizzegiar l'infrastructura ch'è gia avant maun e cun collavurar cun pliras regiuns, tranter auter er cun Turitg. Là vul el p. ex. nizzegiar l’infrastructura per sports dad indoor. Quella collavuraziun cun pliras regiuns er sur ils cunfins dal chantun or è da nov pussaivla perquai che l'IOC, il comité olimpic internaziunal, ha adattà las prescripziuns.
I dovra er l'anteriur mister olimpia - Gian Gilli
Il CEO da la Hamilton è persvadì ch'i dovra er Gian Gilli cun ses contacts e sia experienza en il nov team d'organisaziun per avair success avant l'IOC. I ha er gia dà discurs tranter ils dus «misters olimpia» e Gian Gilli è pront da collavurar, dentant betg pli sco grond promotur che tira il char e maina sairas d’infurmaziun e discurs politics. Sco quai che Gian Gilli ha ditg envers RTR veglia el plitost star davosvart sco organisatur e manager.
Il fieu per gieus olimpics è anc adina qua.