Bainbaud ina «spezia rara» – ils medis da chasa

Il chantun Grischun ristga d'avair bainbaud memia paucs medis da chasa. Perquai emprovan las organisaziuns professiunalas ed il chantun da dar cuntrapais, tranter auter cun il project «Capricorn».

A prima vista na pari betg dad esser in job enorm attractiv: ina lavur pli u main solitaria, 24 uras sin pichet, star a disposiziun quasi 365 dis ad onn, ina responsabladad per vita e mort. Esser medi da chasa è senza dubi pretensius.

Adina pli paucs medis da chasa

Il maletg classic dal docter da vischnanca cun la pratica amez il vitg en sia chasa privata, quel perda plaunsieu conturas. I dat adina pli paucs medis da chasa en il Grischun. Spezialmain en regiuns periferas è però la preschientscha da tals medis ina necessitad.

Sursiglir cuntegn supplementar

Il film «Medis da chasa»

RTR mussa en ils Cuntrasts il film «Medis da chasa» da l'autura libra Sylviane Gindrat. Igl è in purtret filmic da dus medis rumantschs: Edith Oechslin-Decurtins (Cuira) e Gian Bundi (Vella).

«Medis da chasa» sin SRF1:
1. part: Cuntrasts, 23.10.2016, 17.25
2. part: Cuntrasts, 30.10.2016, 17.25

L'organisaziun professiunala dals medis ha analisà dacurt la situaziun e spetga a partir da l'onn 2020 ina mancanza alarmanta da medis da chasa en il chantun Grischun.

Tenor quest'analisa è la vegliadetgna media dals medis da chasa gia oz tar 59 onns. Passa 20 medis en il Grischun lavuran anc en lur pratica, schagea ch'els fissan gia pensiunads.

Dar cuntrapais cun «Capricorn»

Il chantun enconuscha questas cifras e vuless dar in cuntrapais. Quai vul dir promover la furmaziun da medis da chasa – per exempel cun il project «Capricorn».

Quel procura che assistents possian lavurar in mez onn en ina pratica da medis da chasa ed uschia avair invista ed experientschas en questa professiun generalista.

Il medi Urs Fischer è in dals fundaturs dal gleis d

11 min, dals 19.10.2016

Center medicinal a Cuira

In model che vuless prevegnir a la digren da medis da chasa, è quel da centers medicinals, nua che plirs medis da chasa partan ina pratica. Dapi il 2008 exista p.ex. il center medicinal «gleis d» a Cuira, in center cun 7 medias e 9 medis. Lavuravan là a l’entschatta 14 persunas, èn els oz 54 collavuraturas e collavuraturs. Cun quai è quest center il pli grond center medicinal dal Grischun. Il medi Urs Fischer è in dals confundaturs.



Sursiglir cuntegn supplementar

Guardar ils films?

  • Mesemna, 19.10.2016, en il Kino Apollo a Cuira, 19:30.
  • Gievgia, 20.10.2016, en il 'da casa Val Lumnezia' a Vella, 18:30.

RTR prenda sut la marella ils medis da chasa

Tge far, sch'i mancan in bel di en Grischun ils medis da chasa? Co funcziunan las mesiras da vart dals medis e las instanzas chantunalas per evitar quel scenari? Datti models alternativs – models da sinergia e collavuraziun? E co vesan ils medis sezs lur professiun e l'avegnir da quella?

Radiotelevisiun Svizra Rumantscha prenda sut la marella la situaziun dals medis da chasa en Grischun – cun divers films e contribuziuns.

RTR actualitad e Telesguard

Emissiuns tar quest artitgel